O ATELIER
De ir lonxe
a mirar máis preto.
Percorrín 65 países. Agora tamén exploro preto da casa: aprendo técnicas, traballo coas mans e comparto ese tempo con outras persoas.
Son Inma.
A persoa detrás
de Slowly Atelier.
Durante anos, as viaxes ocuparon boa parte da miña vida. Percorrín 65 países e sigo compartindo historias en A World to Travel. Entre lugares e persoas aprendín a reparar nos detalles, a acompañar grupos e a contar o que fai especial unha experiencia.
Coa maternidade chegou outra maneira de vivir o tempo. Quería seguir explorando, pero con espazo para a vida que tiña preto. O papel, o debuxo e os materiais foron abrindo esa porta.
Slowly Atelier nace de aí: das ganas de crear e compartir encontros que teñan sentido. Sigo aprendendo e probando; preparo cada proposta para que ti poidas achegarte a unha técnica con acompañamento, curiosidade e liberdade para facela túa.
Quero que vir a un obradoiro sexa un bo plan: un lugar agradable, boa compañía e tempo para gozar facendo algo coas túas mans.
PRETO, SEN PARAR
A Mariña Lucense e o Barbanza.
Un atelier que se move.
Con base en A Mariña Lucense e o Barbanza, os obradoiros celébranse en distintos espazos de Galicia e do occidente asturiano.
Interésame ese encontro entre o cotián e o que aínda non probamos. Un paseo convértese nunha páxina. Un papel, en luz. Unha conversa, nunha proposta para un grupo.
E impórtame que haxa sitio para a vida real. Se queres vir con crianzas, coméntamo: na maioría de encontros podemos buscar como facelo posible.
XA CREAMOS XUNTOS
Cada lugar achega algo distinto.
Dos obradoiros de Ler Conta Moito ao origami en La Balastrera ou á pintura ao aire libre en Barreiros.
Ver experiencias anteriores ↗